oasis500 بتعمل استثمار في الرياديين بعد تدريبهم على مواضيع لازم يعرفوها لحتى يبلشوا شركة, تدريب لمدة ٦ ايام بس. الفكرة كتير عجبتني وبس سمعت انهم جايين على فلسطين كنت بستنى فيهم وقدمت اول ما اعلنوا عن الموضوع.
اول يوم في التدريب كان حلو بس متعب وممل في بعض الاحيان. بس في كتير اشياء تعلمتها ما كنت بعرف فيها اشي. وحسيت حالي اني عم بتعلم شي عنجد رح يفيدني في حياتي. وكنت كتير متحمسة للموضوع. مع اني شوي اكتأبت لانه حسيت حالي ما عندي شي اقدمه وانه فكرتي لازمها كتير شغل. بس كتير حبيت المدربين واعترفت لأسامة فياض بحبي قدام كل المشاركين. ما تفهموني غلط! بس هاد الشخص كتير بحترمه وبحب اللي عمله في الاردن وروحوا على الموقع oasis500.com وشوفوا انا شو قصدي. انشالله بصير هيك بفلسطين كمان :-)
تاني يوم وصلت متأخرة لبعض اسباب يمكن ما تكون مهمة, بس تعاقبت في اني ما اشارك في ال2minutes pitch وكان شعور كتير سيء, حسيت حالي في المدرسة والمس وقفتني على اللوح لاخر الحصة. حتى الصورة اللي مع الضيف الريادي اللي كل يوم بجيبولنا حد نتعرف عليه ونسمع قصته ونستفيد من خبرته ما كنت فيها, ما كنت عارفة شو اعمل اروح اتصور معهم والا هاد جزء من العقاب فما تحركت. هاد لحالها عقاب مرتب, كنت قاعدة زي الحزانى على الطاولة والكل واقف قدام الكاميرا لحتى يتصور! المهم تقبلت الموضوع وما علقت, وحكيت يلا بستاهل.
اليوم, وهوه تالت يوم في التدريب جيت بكير ولقيت تشجيع خطير على هاد التطور الرهيب على التزامي في الوقت, اجت الorganizer بكل حب تحكيلي انه تصرفي مبارح مش مقبول, وانه انا مش رح اتأهل لأي مرحلة بعد التدريب, وانه حتى ما رح اعرض فكرتي على اللجنة. فأنا كتير انبسطت انه صحيت كتير بكير لاجي هون وانبسطت اكتر اني الليلة قرأت المادة اللي انبعتتلنا زي الشاطرين, وانبسطت اكتر واكتر انه ما حد نبه على هاد الموضوع اللي هوه كتير مهم وما لازم يجي هيك على السبهللة او مفاجأة. انه جد تباً, قلبي الصغير لا يتحمل! :(
احلى شي في الموضوع انه اول يوم صحيت من الساعة ٥:٠٠ لحتى اوصل على الوقت لاني كنت في طولكرم مش في رام الله. وبالرغم من اني وصلت بكير, اللي كان لازم يفتتحوا التدريب وصلوا متأخرين وأخروا الافتتاح, ولحتى اجى اخر اليوم روحت هلكانة رسمي! بس الوضع فوضى والله فوضى ليش بتشاطروا عليي! والله لو انه التدريب مرتب وحاكينلنا عن هاد الحكي كله ومنبهينا ما بزعل!
بعد الخبر الرائع مش عارفة اركز في اشي ولا اسمع اشي من اللي بحكوه, لهيك رح اخلص هاد المدونة احمل حالي اروح اشكرهم على دعمهم وبرنامجهم الرائع واروح اشوفلي شي اعمله بدل ما كل يوم احس حالي اني عاملة جريمة واشي كتير غلط اللي بستحق اني اتعاقب بالأول وبعدين اطلع من البرنامج. يعني اذا بدهم اطلع بس يحكولي مش يعملوا فيي هيك حرب نفسية! اكون موجودة هون كمالة عدد بس وممنوع اشارك! ينعن ينعن.
جد YOU CAN'T TRUST THE SYSTEM!
تعليقات
إرسال تعليق