اصلاتن عادي!

كنت عم بقرأ في اشياء كاتبتها زمان. حسيت قديش كنت دراما! ولاحظت اني اغلب الوقت بكتب بس اكون متدايقة. لهيك قررت اكتب هالمرة وانا مبسوطة ومتفائلة في الحياة.

مبارح كملت تسجيلي لاخر فصل الي في الجامعة. وانشالله رح اتخرج بعد جهد جهيد, بشهادة دكتوراة في البكالوريوس ,على رأي بابا لأني بالمرة ما طولت في الجامعة! بس الي ٦ سنين ونص.

أول مرة انا بدفع القسط. كان شعور جميل اني بعتمد على حالي. بس كتير تعاطفت مع بابا, لانه مشاعري شوي تدمرت وانا ادفع المصاري, مسكين ما خلى اشي في بالنا الا جبلنا اياه ودفع علينا بلاوي. انشالله بنردلك اياها في الافراح ابو الشباب :-)

هاد الايام حاسة حياتي مقلوبة قلب. يعني عندي شغلي اللي جد كتير بحبه ومعبي وقتي منيح. وهلأ عندي الجامعة وانا مقررة اني هالمرة انجح في المواد. مش عارفة كيف وليش, بس انشالله اعرف قبل ما يخلص الفصل.

كمان تغيير جديد صار في حياتي اني بطلت single بعد ما حكيت الف مرة انه هاد الشي مستحيل يصير واني مستحيل حتى اتخيل مجرد تخيل انه اتزوج او يكون عندي ولاد في المستقبل. اي والله ما هيه زابطة معي اتخيل حالي أم!

مرات بشفق على محمد وبحس انه مسكين غلط غلطة عمره في انه تقدملي. بحس حالي دراما وسوداوية وعندي افكار غريبة عن المستقبل في كتير من الاحيان. يعني مش دايما. بس بتجيني حالات. بحس انه صار بسرعة الموضوع بطريقة لسه مش مستوعبتها! بس برجع بشوف صورنا وكيف كلها حب وبرجع متفائلة D:

كمان بتزكر بس كان يحكيلي انه كل ما يشوفني, اغنية isn't she lovely بتشتغل في دماغه. بس مش اي نسخة, هاد النسخة من الاغنية:

كتير احيان بحسه بياخدني ع قد عقلي وانه بسايرني زي الولاد الصغار. بحب انه بحكيلي قصة قبل النوم ازا كنت اتولدن وحكيتله مش عارفة انام. وبحب كيف بصحيني على دوامي الصبح. وكيف بحكي لرهام تعملي كاسة شاي لاني مش حاسة منيح. وكيف بحكي للميس انها تهدى وتخليني انام لانه بكرة دوامي بكير. (اسكت انت واياه واياها. بديش اسمع تعليقات على هاظ الحكي)

بتزكر اول ما حكيت لامي انه رح يتقدملي صارت تضحك وتحكيلي طيب شاطرة, وسكرت الخط وهيه لسه مش مصدقتني مفكرتني بفلم عليها. وبابا بحكيلي, طيب يا بابا الك كم شهر بتحكيلنا قديش بتكرهيه انه انتي كيف حالك؟ (انا الحمد لله تمام وانت كيف حالك؟!)

بحب هاد الاغنية كتير وبنبسط بس اسمعها. مش لانه بعتلي اياها في يوم من الايام بس لانه في الها ذكريات كتير حلوة. ورح احطها في حفلة الخطبة ازا ضلينا صامدين لشهر ١٠ وانشالله ما نتخوزق بالاسعار, او باشياء تانية. اظن بابا محضرله interview اصعب من اللي عملها بس اشتغل في Google. اصلاتن عادي احنا ما بدنا نتجوز!