اظن اغلبكم سمع في اللي بصير في بيرزيت, وانه سكرت الجامعة بسبب "احتلال" الطلاب مبنى الادارة. صراحة من كتر ما بسمع عن الموضوع والفيس بوك كله مليان تعليقات عالموضوع, حكيت خليني انا كمان اكتب, ما هيه خربانة خربانة.
يوم الخميس من كتر ما شفت posts على الفيس بوك وtweets ونداءات استغاثة ومش عارف مين نقلوه على المستشفى, حكيت لأ بنفعش هيك, شو هااااااااظ! احنا في سورية ولا مصر ولا وين بالزبط! وخلص فقعت معي وحكيت الا انزل على الجامعة والموضوع ما بنسكت عنه نهائي! وفعلا من كتر ما كنت مستفزة حملت حالي ونزلت مشان اتضامن مع المتضامنين (يعني حسب ما كنت اسمع على الfacebook وtwitter)
وصلت الجامعة بس شو كان الوضع من الاخر, يعني انخنقت من كتر العجقة
مليان ناس ما عرفت وين اوقف!
يعني صراحة مش عارفة اعبر عن مشاعري ب"ثورة" واعتصام طلاب بيرزيت حسب ما سمعت على الفيس بوك! كنت انا وحالي والمطر, حسيت انه لازم اصور فيديو كليب واستغل وقتي والجو الرومانسي اللي انا كنت فيه!
رجعت وانا اسب على الجامعة والطلاب واحكي الله يجعلوا لا حدا تعلم وانشالله اتضل الجامعة مسكرة, مش الطلاب مبسوطين وبس شاطرين في الحكي, وبس اتحمست ورحت بسبب هاد الحكي ما لقيت حدا!
بعدين صرت افكر, طيب انا ليش رحت؟ انه صح استفزني بس حكو انه مانعين سيارة الاسعاف تمر, بس انه على ايش معتصمين؟ شو مطالبهم؟ انه بعرف انه بطالبوا بحل مشاكل الازمة المالية والناس اللي مش قادرة تدفع بس انه شو مطالبهم بالزبط؟ ومش همه بمثلوا الطلاب؟ طيب انا طالبة وما بعرف شو بدهم/بدنا. يعني فرصة سعيدة تحكولنا احنا على شو بنتضامن وشو المطالب.
وفعلا تم نشر المطالب اللي يا ريتهم ما نشروها! الحلو في الموضوع انه بحكو هاد ما كانت النسخة النهائية, واحنا عدلناها. طيب يا عمي ليش موقعين على نسخة مش نهائية؟ بعدين انتو اللي نشرتوها, بلاش بياخة واعترفوا انكم غلطتوا وعرفتوا انكم غلطانين وعدلتوا المطالب وخلص! مش لازمها فلسفة الشغلة!
المهم هلأ النسخة المعدلة هيها وهاد المطالب معقولة وكل احترام للي معتصمين لتتحقق المطالب هاد. انا مش ضد المطالب ولا الطلاب, بالعكس كتير مبسوطة انه الطلاب عم يتحركوا ويطالبوا في تحسين المستوى التعليمي, والاكاديمي, بس الاسلوب مش عاجبني, انه كل شوي بطلعوا في شغلة, يعني همه نفسهم مش عارفين شو بدهم! بطل حد عارف هوه معكم ولا ضدكم! اركزولكم عشغلة وتوجعولناش راسنا كل شوي بيان شكل!
المهم من ناحية الجامعة الله يرضى عليها, ولا حد لازم يسكت على تسكير الجامعة, شو ما صار! ولازم الكل ينزل على الجامعة ويحتج سواء كان مع او ضد الطلاب المعتصمين! انا شخصيا ما بتهمني الجامعة وما مصدقة اخلص منها (بس بحب اطنش المحاضرات بمزاجي ما بحب حد يجبرني!) انه القصة مبدأ وفي ناس بدها تتعلم, يعني رئيس الجامعة جاي مشان يسكرها بدل ما يحاول يحل مشاكلها (والله بتتعب يا اخي ارتحلك شوي!) بعدين البيانات والتصريحات اللي بتعملها الجامعة وعينك عينك بتكزب فيها, والاحلى بتنشرها على موقع الجامعة للطلاب! يعني ليش؟ انه بحيااااااااة ابوووك من وين بتفكر؟ طيب ما همه عارفينك بتكزب بكل عين قوبة بتحطلهم اياه على موقع الجامعة؟ طيب يعني انت مفكر لمتى رح يضلوا الطلاب ساكتين؟
صرت حاسة حالي في سوريا او مصر, كل واحد بحكي قصة على مزاجه وكل واحد بطلع بيان على كيفه, وبكتب اشياء الله اعلم صح او لأ. بطلت اعرف مين اصدق ولا الطلاب المعتصمين معهم الحق والا عليهم. بس اللي بعرفه انه الي بضل يطلع رأي الجامعة في الموضوع وقراراتها البايخة وتصريحاتها اللي كلها كزب بكزب, لازم على رأي رجائي, ينطم ويسكت!
تعليقات
إرسال تعليق