من اول ما نقلت عالسكن الجديد وانا disconnected ما في عنا نت ومجرد ما اروح عالسكن بنفصل عن الدنيا (شعور شنيييييييييييييييييع جدا) مبارح بكل ثقة بحمل حالي وبروح على bazinga! لحتى اول شي اقرأه اول ما افتح النت هوه انه ستيف جوبز مات! متت وانا ادور على حد يحكي انها مزحة بايخة ومتخلفة وحيوانة واوباش, بس عالفاضي الخبر مزبوط. ستيف جوبز من اكتر الشخصيات اللي بحبها وخطابه في ستانفورد دايما بسمعه, ومرت فترة اسمعه كل يوم واحيانا اكتر من مرة في نفس اليوم. جد كنت بتمنى اني اشوفه في يوم من الايام وماّمنه انه فعلا رح يصير هاد الشي.
اول ما عرفت انه خلص مات, جد انخنقت, يعني هوه مش من توالي قرايبنا ولا اشي, بس انا كتير بحبه, وكنت حاسة حالي مخنوقة ونفسي ابكي.
المشكلة في حياتي بكيت على كتير شغلات وكتير اشخاص تافهين ما بستاهلوا حتى اني افكر فيهم ف كيف اني ابكي عليهم, مع هيك بس مات شخص كتير بحبه وكان واحد من احلامي الوردية اني اشوفه واحكي معه ما بكيت.
احلى شي انه لازم اروح على البيت مشان سهرة ابن عمتي! يا ربي مش جاي عبالي. وازا حكيت لحد انه ستيف جوبز مات وانه انا مش طايقة حالي. رح يحكولي: مين الأخ؟!
بغض النظر روحت عالبيت وكنت لساتني مستنية انه حد يجي يحكيلي انه هاد مزحة تقيلة دم, وبس وصلت رحت على الحفلة زي اللي عنجد. بس هناك جد شطبت معي الامور ما خليت شي الا عملته. جد بعجب بس اكون كتيييير متدايقة. والكل مبسوط عليي انه زمان ما شافوني, وانا ماشالله عاملالهم جو! وخلص اليوم وروحت وطلع ما في نت في البيت! (ينعن اخت هالحظ!)
تاني يوم اللي هوه اليوم, اول شي عملته انه اتصلت على حضارة (بدي النت ينعن ينعن) وفعلا رحت اشوف مرة تانية انه ستيف لساته عايش. عالفاضي! ساعتها جد اكتأبت ومش جاي عبالي اروح عالعرس, وعندي حساسية ويا دوب شايفة الفضا.
رحت عالعرس متنكدة, وعيوني مدمعين (مش لاني زعلانة انه من الحساسية) وحاولت اندمج مع الوضع وفعلا هناك اندمجت مع الوضع شوي. بس خلص العرس كنت ماكلة هوا, وكتير مدمعة, والكل مفكرني عم ببكي على ابن عمتي (طيب والله بشوفه في المناسبات ليش بدي ابكي؟! صح ما باّمن في الزواج وبعتبره اكبر غلط بس مش رح ابكي عليه لانه عمل هاد الغلطة!)
جينا نطلع بس خلص العرس. زوج ابن عمتي, بشوف بنته جايه تضربها سيارة. بعمل زي الافلام وبروح بسرعة ينقذها وبتضربه هوه السيارة. وعمتي غط عقلبها ونقلوها المستشفى. انا واقفة بطلع كيف العرس خلص بمأساة. برضو ما بكيت. الناس مشغولين في اللي ضربته السيارة, واجت الاسعاف والحالة حالة. وانا عم بفكر يا ترى جد بطل عندي مشاعر؟ والا انا من كتر ما بكيت بسبب ناس تافهين ومواقف تافهة بطلت الغدد الدمعية عندي تعرف شو اللي بستاهل وعملت اضراب؟! (الناس في ايش وانا في ايش!)
روحت عالبيت وهيني عم بسمع خطاب ستيف جوبز اللي دايما بسمعه بس احس انه بدي شي يواسيني, وعمتي وزوج بنتها في المستشفى. الله يستر!