وبعدين في هالشغلة!

والله أنا كل يوم بتفاجأ في اشي, وكل يوم بلاقي شغلة أكتب عنها, مع اني ما تصورت تاخد ايدي عالكتابة, بس برجع بحكي والله الموضوع بستاهل ينحكى فيه! المشكلة انه هلأ دخلوا أهلي في الموضوع. كان مبارح يوم مليان مغامرات (هوه بدكم الصراحة كان مليان مكالمات)

هاد مبارح صديقتي العزيزة راحت عالعمادة تشوف شو بالنسبة للحكي انه هيه سحبت الشكوى, مسكينة ما لحقت تدخل من الباب وتسأل هالسؤال, فاعوا فيها وما تركولها مجال تحكي, معصبين وحالتهم حالة, وحكولها ما انتي دخلتي علجنة النظام, شو رأيك يعني؟ أكيد الشكوى مكملة. وحكولها وانه القرار بطلع يوم السبت, وهيك أشياء (مسكينة اجت الدقة فيها!)

المهم جابوا سيرة الأشياء اللي أنا كتبتها وصاروا يدافعوا عن مواقفهم, ويحكوا هاد الأشياء للبنت بعصبية, وكل ما تيجي تحكي يحكولها خلي العميد يحكي, وضلوا يحكي ويحكي ويحكي... وهيه تستنى دورها. (طيب هيه مال أهلها ازا أنا اللي كتبت هاد الأشياء؟! يا حسرتي عليكي شكلك خلص انحسبتي عليي. أكلتي هوا!)

من بين الأشياء اللي حكوها انه همه ما بياخدوا بالأشياء اللي بتصير عالفيسبوك (واااااال يا زلمة, شكلك مش سامع في اللي صار في مصر؟) وانه لازم يكون اعتداء جسدي أو بالشتم لحتى ياخدوا اجراءات وهيك أشياء (طيب يا عمي عرّفلنا الشتم؟ يعني ازا كل الكلام اللي كتبوا النا مش شتم معناها جد اهلي ضحكوا عليي وأنا صغيرة. يعدمني اياه هوه وكل اللي بحاولوا يحموه! هاد ازا في حد بحاول يحميه طبعاً. أما شغلة الاعتداء الجسدي فما تخافوا لسه ما ضربته وبوعدكم أحاول ما اخليكم ترفعوا عليي شكوى في هاد المجال)

حكوا كمان انه العميد بزات نفسه (اسم الله! واوعكم تاخدوا اني بسب عليه أو بتهكم أو هاد الحكي الكبير اللي انا مش قدّه. أنا بس حكيت هيك مشان الحسد!) رح يرفع عليي شكوى على الكلام اللي كتبته وانه فيها فصل من الجامعة الشغلة (طيب يا عمي ما انت ما بتاخد بحكي الفيسبوك والايميلات ليش بدك تاخد بحكي ال Blog؟!! يعني كمان شوي بصير حاسة انه بتحاولوا تقلبوا كل الموضوع عليي خاوى لسبب الله اعلم شو هوه؟! انتو عنجد بتحاولوا تقلبوا الموضوع عليي ولا أنا بتهيألي!)

المهم بعد نقاش طويل (نقاش من طرف واحد لأنه صاحبتي ما حكت اشي!) اجى الدور عليها تحكي. حكتلهم أنا بس جاية أسال سؤال واحد انه شكوتي مكملة ولا لأ وخلص. وحكولها انه مكملة وحملت حالها وطلعت!

أنا ما كان عندي علم في كل هاد وكنت بره الجامعة أساسا, بس اتصلت عليي صاحبتي وخبرتني انه رح يرفعوا عليي شكوى. صرت أحكي خلص لازم أحكي لأهلي (مع اني كنت ما بدي أشغل بالهم في هاد البني ادم التافه اللي رفعنا شكوى عليه, وانا بعرف أدير بالي عحالي وما بدي أروح أشغلهم في شي بقدر أتعامل معاه! بس برضو ما كنت متخيلة العمادة يعملوا فيي هيك وتوصل الأمور لهون. يعني كان الحق معي, كيف صار عليي الله اعلم!)

المهم كنت لسه بحكي اني بدي أحكي مع أهلي أخبرهم, يعني خليهم يستوعبوا الموضوع حبة حبة, ويكونوا في الصورة, بلاش يوصلهم جد اني انفصلت هيك مرة وحدة (يا فرحة قلبه راسم! اللي هوه بابا)

حكيت مع ماما وحكيتلها عندي الك خبرين أول واحد عادي والتاني رح تحكيلي ينعن امك (أصلا بس ماما) المسكينة ماتت خوف بتحكيلي شو في؟ حكيتلها أول خبر ما معي رصيد وبدي كرت! صارت تضحك وتحكيلي طيب والتاني (مسكينة فكرتني بتخوت وتاني خبر يطلع بدي مصاري أشتري أواعي متلا!) حكيتلها بدي أنفصل من الجامعة! وفعلا حكتلي ينعن أمك (والله لولا انها بتمون وغالية عليي كان فرجيتها, شو هاد بتسب على أمي!) المهم حكيتلها القصة. وحكيتلها انه لسه ما حكيت لأبو رجائي (اللي هوه بابا)

ما لحقت أحكي معها الا عمّي بتصل فيي (أول ما شفت اسمه حكيت ينعن ينعن, أكيد قرأ اللي كتبته, يا فرحتي وصلهم الخبر قبل ما أحكي لبابا!) رديت عليه الا بحكيلي شو بالنسبة للي صايرمعك؟! وكنت بدي أحكي مع أبوكي حكيت بلاش ما يكون لسه بعرف, ويروح فيها الشب (بعيد الشر عنه حبيب ألبي راسم) حكيتلوا عالقصة باختصار شديد, الا هوه صار يحكي بالتركي ("يحكي بالتركي" عبارة تدل على انه مش عاجبه الوضع) المهم صار يحكيلي ازا الشغلة واسطة بنجيب واسطات, هيه عكيفهم الشغلة وهلأ بحكي مع أبوكي يحكي مع معارفه هوه التاني وأحكيله يطلع على رام الله كمان ويتفاهم معهم. حكيتله طوّل بالك يا زلمة, مش مستاهلة القصة يصير كل هاد! (يعني انا ما حكيت انه الموضوع واسطة, بس ازا فعلاً طلع هيك أكيد ما بدي أكون طرف فيه وأدخل واسطة أنا كمان, لأنه ازا طلع واسطة بدي أنعن ها, وبدي أشوف شو بالنسبة للقوانين واللافتات تاعت انه الواسطة جريمة يعاقب عليها القانون بالسجن من 3-15 سنة ومش عارف شو. ما هاد اللي ناقص عآخر الزمن واسطة في الجامعة! عنجد ينعن ها ازا الموضوع هيك!)

المهم تفاهمت معاه وقررنا بالاخر نقدم الشكوى لحد تاني في الجامعة ونشوف شو بصير فيها!

جيت أحكي مع بابا طلع عمي سابقني وكان قلقان كتير, بس لما سمع القصة حكالي بطلعش في ايدهم يفصلوكي وانتي مش عاملة شي غلط ولازم ينشغلوا في انهم يحاسبوا هداك الاشي على اللي عمله, مش يلتهوا يطلعولك شغلات من تحت الارض مشان يعملولك مشكلة, انه شو المسج اللي عم بحاولوا يوصلوها! (ولكم أصلا بس أبو رجائي ينعن ينعن!)

المهم حبيت بابا بعد هاد التلفون بس المشكلة انه عارفة رح يضله شاغل باله الموضوع وأنا ما كنت حابة يصير هيك. وفعلا حكى معي أكتر من مرة يشوف ازا فيه شي جديد.

بعدين سمعت طراطيش حكي انه في شكوى عليي على أساس انه التصوير ممنوع في الجامعة (أنا مش متأكدة ازا هاد الحكي صح أو لأ) طبعاً أنا أول مرة بسمع في هاد القانون كان بس صرّخ عليي واحد من لجنة النظام وحكالي انه ممنوع, الحلو انه بس سألته من متى هاد القانون وانه ما عمري سمعت عن هيك شي. حكالي انه هداك اليوم كان ماشي مع مش عارف مين, وفي بنت صوّرت (بعرفش ازا في حكمة من الموضوع ورا انه حكى بنت عأساس يقنعني انه ما بفرق معه حدا, أو ازا في اشي تاني ورا هاد الحكي أو ازا كان بس مجرد موقف عم يحكيلي اياه وما في حكمة من وراه) المهم حكالي انه راح وخلّاها تحزفهم (طيب شو دخل طز في مرحبا؟!! يعني انا بسأله من وين الواحد بعرف هيك شي, وانه من ايمتى هالقانون, صار يحكيلي عن قصة حياته! وأنا مال أهلي انت شو عملت؟! أنا الي بدي أعرفه القانون موجود ولا لأ)

المهم أنا قبل هيك لما رحت عالعمادة وراجعوني هناك في شغلة الBlog سألته ازا التصوير ممنوع, حكالي انه ما بعرف بس ممكن يسأل عن الموضوع ويردلي خبر (طيب ازا الناس اللي في عمادة شؤون الطلبة ما بتعرف ازا في هيك قانون عنجد, انا شو بده يعرّف أهلي؟ أي ما الناس اللي شغلتهم القوانين بعرفوش جايين تحاسبوني أنا!)

في كمان شغلة, انه شكله هداك البوكيمون لساته متابعني وطبع اللي كتبته وبعته عالعمادة وهاد بثبت انه Stalker! وبثبت انه لازم يتحاسب عهاد الشي لحتى يتربى وينقلع يروح يهتم في حاله بدل ما هوه شغال يراقب الناس ويبعتلهم مسجات! المهم انه وصلهم ال Blog التاني. بس جد يعني ازا هوه اللي بطبع ال Blogs وببعتهم للعمادة كل يوم بدي اكتب واحد مشان أعوض ملف المسجات والايميلات ابو 17 صفحة اللي بعتناه للعمادة عالفاضي! وضلّك اطبع وادفع!

الحلو في الموضوع انه جد عم بحس انه شغلهم الشاغل يستنوا مني أقل غلطة مشان يحاسبوني عليها, مع انه شكيت هداك الاشي والمفروض يكون شغلهم كيف يعاقبوه مش كيف يدورولي أنا على شغلة. يعني جد والله العظيم صرت حابة أعرف (بس فضول) شو السبب ورا انه بدهم يطلعوا موضوعي تافه وما بستاهل, وكل المواضيع التانية من اصغرها لاكبرها مهمة وبتمس مهنية لجنة النظام ومش عارف شو من هاد الأشياء الي بحكولي فيها ومصممين يعملولي مشكلة.

طيب شو رأيكم انكم علمتوني درس كيف ادافع عن حالي قدامكم! رح أستخدم نفس الحجج اللي استخدمتوها حتى تدافعوا عن هداك التافه اللي ما بستاهل اشي. وازا حكيتوا انه ما بتاخدوا في الشغلات اللي على الفيس بوك والنت ليش بدكم ترفعوا عليي شكوى على اشي صار عالانترنت. وازا لازم يكون الاعتداء جسدي او بالشتم أنا ما ضربت العميد ولا اي حدا من اللجنة ولا سبيت على حدا. وازا بدكم تحاسبوني اني كنت اصور اعرفوا كيف توصلوا القوانين للطلاب (ولموظفينكم بالأول) بعدين تعالوا حاسبوني!

فيه مؤسسة للإعلام هون في رام الله, اسمها شبكة أمين الإعلامية كانوا رهيبين, وحكولي انه هاد شغلتهم يحموا المدونين الفلسطينيين, ووضحولي اني أنا مش كاتبة شي غلط ومش من حقهم يجوا يحاسبوني عليه, وحكولي انه ازا صار اي اجراء من الجامعة ضدي رح يساعدوني في الموضوع ورح يتابعوا في موضوعي للاخر.

هلأ يوم السبت الي قعدة مع 2 من الجامعة مشان هاد المشكلة واللي سمعته عنهم انهم بفهموا كتير ومستحيل يظلموني, وانشالله يطلع الحكي اللي سمعتوا عنهم صح وما يصير أكترمن اللي صار. لأني أنا قدمت شكوى حتى تتصرف فيها الجامعة وتوقف هداك البوكيمون عند حده, يعني المفروض الجامعة تقدر تحمي طلابها, مش يحاولوا يقلبوها شكوى عليي!!

قرار لجنة النظام بحق هداك البوكيمون برضو يوم السبت(بنشوف شو طلع معهم!) وطبعاً رح اكتب كمان Blog عن قرار اللجنة وعن طريقتهم في التعامل مع الموضوع.

كنت بدي اكتب هاد الاشي مبارح بس لمّا روحت عالبيت استشهدت بعد اليوم الطويل!