رحت اليوم على العمادة أشوف شو صار بالشكوى, الموظف اللي هناك حكالي إنه طلع القرار ورح يخبرنا فيه يوم السبت (بعرفش ليش السبت يعني بما إنهم مقررين وجاهزين) وراجعتهم بالشغلات اللي صارت مبارح, الا الموظف بطلع ورقة مطبوع عليها ال Blog اللي كتبته مبارح (يااااااااااي أول Blog بكتبه انشهر بهالسرعة هاد, يعني نشرته مبارح بالليل واليوم الصبح صار عند العمادة, أصلا بس أنا!)
صار يقرأ فيه قدامي ويعلق على الأشياء اللي فيه, ورح أحكيلكم عن شو علّق. بعدها رح تشوفوا التناقض الرهيب في الموضوع في موقف العمادة من مسجات هداك المحترم والشكوى اللي قدمناها, وفي موقفهم من ال Blog وهمه يحاولوا يطلعوا شي منه يحاسبوني عليه.
" طبعاً العميد أقنعنا إنه مش فارقة معاه إزا خاله في الأمن الوقائي والا في "بطيخ" (على رأيه)" سألني إزا العميد حكى كلمة بطيخ (والله ما بجيب اشي من عندي, كتبت اللي انحكى, ومن كتر ما عملتوا فيي مواقف مبارح طلعت دفتر وصرت أكتب في الأشياء مشان ما أنسى)
"(ولا كإني أنا موجودة ولا كإني رافعة شكوى ولا شايليني من أرضي أساساً)" قال شو هاد مش شايلني من أرضي أساسا, هاد الحكي مش صح, بعدين انتي عارفة شو يعني مش شايلني من أرضي؟!. حكيتله والله هاد اللي شفته وحسيته من الموقف الي صار (يعني واحد جاي يحكيلي إنه قرروا باتفاق الطرفين, طيب وأنا وين رحت؟ أنا مش طرف يعني؟ وكيف بدكم أحكيها؟ والله صار لازمنا قاموس لنعرف كيف نتفاهم معكم!)
" ورحنا عأساس نحكي كل شي صار ويسألونا وهيك أشياءات يعني زي اللي بنشوفه في الأفلام." بحكيلي احنا مش بفلم أجنبي. حكيتله بعرف ما انا اكتشفت مبارح (يا عمي أنا حابة أعمل تشبيهات وأحس حالي فرخ شاعر وين المشكلة؟!)
"الشكوى تاعتي "تافهة" وما رح تمر من لجنة النظام!" العميد حكى تافهة؟ جاوبته آه حكالي هيك. (اللي بعده!)
"طلعلنا واحد من لجنة النظام يسألنا بكل برود أعصاب "انتو لسه بدكم تدخلوا على لجنة النظام؟" (بالله عليييييييييييك؟ بتتخوت ولا بتتخوت؟؟ يعني أنا جاية أشم الهوا متلا, الي أسبووووع قاعدة هون مشان تيجي تسألني هاد السؤال!!! ارحموني يعني هدول تلات ساعات ونص وبدون لاب توب كمان! مشان ربك!)" حكالي بتعرفي إنه من حق الأستاز اللي حكيتي عنه هاد الحكي يرفع عليكي شكوى للجنة النظام وتنفصلي من الجامعة. بحكيله أولا أنا ما حكيت اسم أي حد. قاطعني بحكيلي بس الكل شافه بس طلع وحكى معكم يعني بعرفوا عن مين بتحكي. (والله مش مشكلتي حدا شافه أو ما شافه, مشكلتي إنه كتبت عن اشي صار معي وما زكرت أي اسم, إزا زكرت اسم حد فيكم راجعوني!) بغض النظر عن كل هاد كملت كلامي وحكيتلو ما سبيت ولا غلطت في حد. حكالي انو هاد الي كتبته اسمه تهكم واستهزاء على الأستاز (بالله علييييييك, هلأ هاد بستاهل أنفصل عليه أما كل اللي عملوا هداك البوكيمون والمسجات والبهادل والتهديدات قعدتوا تقنعونا ساعة إنه الشكوى ما بتستاهل وفي مشاكل أهم وما لازم نكبرها وتوصل للجنة النظام!! بعدين يمّا شو ما أحكي أهم اشي ما أخدش الحياء العام! أو هيك علموني في اجتماع اللجنة!) "إلا واحد فيهم بصرّخ فيي (على أساس إني بنت اللي خلّفه يحكي معي هيك)" بحكيلي شو هاد بنت اللي خلفه؟ (طيب هوه يصرخ فيي عادي مسموحلو أما انا بس احكي هيك بصير بدها لجنة نظام؟! طيب ما هوه أنا عنجد مش بنت اللي خلفه وما إلي غير 5 أخوة مش معقول يطلعلي اخ سادس! شو حكيت اشي غلط؟!)
"(صرت أحكي لحالي ينعن ينعن, هلأ كل واحد بسألني 100 سؤال وهات لحّق)" حكالي انتي هيك بتشككي في مهنية لجنة النظام, هاد شغلهم يقرروا يسألوكي سؤال واحد ولا 100. حكيتله ما شككت في حدا أنا بكتب عن توقعاتي شو بده يصير وعن شو اللي فعلاً صار.(حسيت حالي زي الي عنجد! قال بتشككي في مهنيّة لجنة النظام!)
"(يؤبر ألبي ما أنغشه!)" مش عاجبه اني كاتبه هيك (طيب والله بمدح وبتغزل فيه شو بده أحسن من هيك!)
قبل كل هاد الحكي ناقشته في اللي صار مبارح, وحكالي إنه مش احنا الوحيدين اللي طلبنا العميد يحكي معنا قبل لجنة النظام وإنه في ناس وشكاوى كانوا عنده من ال9 (يعني على ذمته) حكيتله يا عمي ماشي, طيب ليش بقرر عني وبحطني على جنب, حكالي انه ما حطني ع جنب وإنه عادي هوه كان بسمع منا.(اه صح! لما ييجي يحكيلي قررنا بتراضي الطرفين وانا اكون اكون الطرف التالت ومش في القرار اساسا هاد اكيد مش عم بحطني عجنب). بعدين حكيتله طيب ليش رحنا علجنة النظام ازا بدهم يسألوني بس سؤال واحد وموجود عندهم. حكالي إنه أصلا احنا حكينا كتير أشياء مع العميد وتناقشنا بالموضوع, وقرألي قانون من قوانين الجامعة بحكي إنه بحق للعميد يسمع لشكوى ويتخذ اجراءات فيها ويخبر لجنة النظام بهاد الشي (طيب هلأ جاي تحكيلي؟ بدري يا زلمة استنالك كمان شوي! بعدين إزا بحقلو يعمل هيك وهاد اللي فعلا صار, ليش ما حكالي؟ ليش وهمني انه في اجتماع للجنة؟ وانه رح تنعرض الشكوى تاعتي؟ ليش اقعد استنى 3 ساعات ونص مشان سؤال ممكن أي حد فيهم يعرف جوابه ازا اطلع على الملف اللي قدمنالهم اياه وفيه 17 صفحة مسجات من هداك البوكيمون؟)
سألته عن هداك الإشي اللي قدمنا الشكوى عليه وازا اجى علجنة النظام أو لأ, حكالي انه أصلا هوه وصاحبتي اتفقوا يسحبوا الشكوى والعميد كان حاكي معهم ال2 عن الموضوع فما كان في داعي يستدعوه وانه في اجراءات بالنسبة لهاد الشغلات ومش عارف شو اشياء كتير ما جمعت منها كتير(طيب ليش بس سألتوا بنفس يوم اجتماع اللجنة عن هاد الموضوع, حكالي انه بجيبوه في اجتماع تاني يستجوبوه؟! والا كان بسكتني يعني؟!)
المهم اني اكتشفت اني بالشكوى هاد لحالي! وانه القرار اللي رح يطلع من اللجنة بخصني أنا وانه صاحبتي مش في الموضوع هلأ. رحت حكيتلها لهاد البوكيمونة التانية (يعدمني اياها) الا هيه بتحكيلي انه ما سحبتها وانه حكتله بدها تكمل معي. ولكن (وينعن اخت ولكن, دايما تيجي وراها مصايب كلمة ولكن!) بس روحت على السكن حكتلي انها تزكرت شغلة صارت, انه انا حضرة جنابي بس طلعت معصبة من عند العميد بعد ما سمعت اللي حكاه انه صاحبتي بدها تسحب الشكوى, هيه حكتله "بس أنا بدي أكمل معها" حكالها ما تخافي رح تضلي مع صاحبتك. (مش عارفة هاد تلاعب بالألفاظ والا صاحبتي غبية ما فهمت عليه والا ال2 مع بعض! بس اللي بعرفه اني هلأ لحالي بالموضوع واني برضو لسه بستنى بقرار اللجنة!)
عموما اخر شي صار انه حط الورق الي مصور فيهم ال Blog تاعي عنده وحكالي "هاد بدي اخليه عندي نشوف شو نعمل فيه (بجوز هاد الكود تاع العمادة ليحكولي اكلتي هوا! او بجوز معناها اشي تاني الله اعلم. اخرتي بعرف!)
عفكرة نسيت أسالوا من وين جاب ال Blog تاعي (هيه ما بدها تفكير باينة يعني بس كنت حابة اتناغش)
المسا رحت على event بحكي عن الsocial media وحكالي حد من مؤسسة الأمين الإعلامية انه القانون الفلسطيني بحميني وبسمحلي أعبر عن رأيي وأكتب اللي بدي اياه. لهيك أي انتهاك لهاد الحرية اللي بعطيني اياها القانون رح اتخذ الاجراءات اللازمة لآخد حقي شو ما كانت!
مش عارفة ازا في اشي نسيت أكتبه هالمرة, لأني ما كتبت ملاحظات. بس انشالله ال Blog الجاي ما أكتبه وأنا مفصولة من الجامعة!
بليز ازا حد بده يطبع هاد الBlog اطبعه ملون بطلع أحلى :)
تعليقات
إرسال تعليق